Ayuntamiento de Ansoáin / Antsoaingo Udala

Webgune honek cookieak erabiltzen ditu, propioak eta hirugarrenenak, zure nabigazioa optimizatu, zure nahietara egokitu eta analisi-lanak egiteko. Nabigatzen jarraituz gero, gure Cookieei buruzko politika onartzen duzu.
2018ko irailak 7

ALKOHOLA ETA BESTE DROGA BATZUK KONTSUMITZEAREN GAINEKO SENTSIBILIZAZIO ETA PREBENTZIO KANPAINA 2018

Antsoain, Berriobeiti, Berriozar, Itza eta Txulapaingo Gizarte Zerbitzuen Mankomunitateko herrietako Jaien ospakizuna dela eta, aurten beste behin ere drogen kontsumoaren gaineko sentsibilizazio eta prebentzio Kanpaina egin dugu.

Aurtengo kartela herritar guztiei zuzendu zaie oro har, pertsona guztiok eta gizarteak drogen kontsumoari loturiko arazoen prebentzioan dugun arduraz gogoeta egin dezagun. Behealdean, hainbat jarraibide ageri dira drogen kontsumoko jokaeretan arriskuak murrizteko, eta bi mezu argi zabaldu nahi izan ditugu: bata, alkohola eta beste droga batzuk kontsumitzeak adingabeengan eragiten duen arazoaz sentsibilizatzea, eta bestea, droga kontsumoak eta neurrigabe erabiltzeak ez dute inola ere eraso sexistarik justifikatzen.

Kanpaina herrietako gazteen etxabe, elkarte eta txosnetan banatuko da, bai eta Arrikurock Jaialdian eta herrietako karrika eta informazio-paneletan ere; era berean, udalen eta gaztelekuen sare sozialetan zabalduko da. Hona, besteak beste, zer banatuko den: kanpainako kartela, Drogamenpekotasunen Foru Planetik bidali dizkiguten foiletoak (hainbat aholku ematen dira kontsumo arduratsua egiteko) eta Ailaket Elkarteak egindako foileto bat, festa egitera atera eta drogen kontsumoarekin kontaktuan dauden neskendako gai interesgarriak jorratzen dituena. Horrez gain, gizonezkoendako eta emakumezkoendako preserbagailuak banatuko ditugu txosna eta herrietako gazteleku edo gazteak topatzeko guneetan, edozein gaztek behar badu, dohainik eska dezan; izan ere, babesik gabeko sexu-harremanak izatea drogen kontsumoari lotuta dagoen jokabide arriskutsua da. Aurten, Arrikurock Jaialdian, Hiesaren aurkako batzordeak karpa bat paratuko du jaialdiaren barrutian, adostasunean, gozamenean, plazerean eta zainketetan oinarrituriko harreman afektibo-sexualak sustatzeko; zehazki, prebentzio-materiala banatzeaz gain (preserbagailuak, lubrifikatzaileak), zalantzak argitu eta galdera zehatzei erantzunen zaie.

Herrietako tabernetan, hainbat gauza banatuko dira, hala nola kanpainako afixa, ostalaritzako jardunbide egokien dekalogoa, eta alkoholaren kontsumoari buruz gogoeta egiteko materiala, Osasun Publikoaren Institutuak argitaratua.

Lehen aldiz, hainbat protokolo lantzeko saio bat eskainiko da aurten; hau da, jaietan nola murriztu arriskuak kontsumoetan, eta nola eragotzi eraso sexistak. Beren borondatez barra-lana egiten ari den jendearendako saioa izanen da. Lehenago, Zerbitzu arduratsuari buruzko prestakuntza eskaini zaie Antsoain eta Berriozarko tabernei, eta espero da gainerako herrietako tabernetan ere egitea.

KARTELA

Facebook
Twitter