Guztira 8 langilek osatzen dute Antsoaingo gizarte enplegu babestuaren brigada, Antsoain, Berriozar, Berriobeiti, Iza eta Xulapaingo Oinarrizko Zerbitzuen Mankomunitateak herri guztietarako kontratatutako 22 langileetatik. Taldeak maiatzean ekin zion lanari, herrian zenbait ekimen gauzatuz.

Kontratuak irauten duen 6 hilabeteetan, Dabid Bizkai udal-langilea enplegu-monitore bezala izanik, prestakuntza eta praktika bateratzen dituen programa bat garatzen ari dira. Prestakuntza-fasea kontratazioaren helburu diren lanak egiteko ezagutzak eta/edo trebetasunak eskuratzera bideratuta dago.

Fase praktikoan, beharren arabera, herriko instalazioak eta espazioak mantentzeko eta garbitzeko lanak egiten dituzte. Lehen aste hauetan igerilekuak ireki aurretik instalazioak prestatzen aritu dira, batez ere pinturari dagokionez. Udako denboraldian kanpoko instalazioen, igerilekuen eta aldagelen garbiketaz arduratzen dira, presiozko maukak eta robotak erabiliz. Era berean, Harrobiren etxabean dagoen botxategi berria margotu dute, baita Ezkaba ikastetxeko ateak, berogailuak eta ikasgela batzuk ere.

Gizarte enplegu babestua

15/2016 Foru Legeak arautzen duenez, gizarte enplegu babestua irabazi asmorik gabeko eta interes kolektiboko proiektuei babesa emateko prestazio ekonomikoa da. Proiektu horiek bazterketa soziala jasaten duten edo egoera horretan aurkitzeko arriskuan dauden pertsonen aldi baterako kontratazioa eskaintzen duten tokiko erakundeek zein Gizarte-Ekimeneko Erakundeek sustatzen dute. Zerbitzua Errenta Bermatua jasotzen duten eta lanpostu bat lortzeko edo mantentzeko arazoak dituzten pertsonei zuzenduta dago.

Programaren helburua, lan kualifikatuaren bidez, kontratatutako pertsonei gizarteratzeko aukerak hobetuko dituzten ohiturak eta gaitasunak eskuratzeko erraztasunak ematea da, eta eremu bakoitzean atzemandako enplegu-sorgunetan kualifikatzea.

Gizarte Enplegu Babestuaren programak Gizarte Laneko profesional bat eta enplegu-monitore bat ditu laguntzaile gisa.