Edukiontzi itxien sistema ezartzearen helburu nagusia hondakinak hobeto bereiztea da, bereziki materia organikoa. Izan ere, ez dugu ahaztu behar edukiontzi marroian biltzen diren gai organikoak direla, behar bezala tratatzen ez badira, ingurumenari kalterik handiena eragin diezaioketenak.

Ildo horretan, Antsoaingo emaitzek oso balorazio positiboa izaten jarraitzen dute. Gai organikoen berreskuratzea erreferentzia gisa hartuta, edukiontzi itxiak instalatu aurretik hilero 17.000 eta 19.000 kilo artean biltzen ziren. Edukiontzi berriei esker, abenduan 48.836 kilo bildu ziren hilabete bakarrean. Datu horiek biztanle bakoitzeko bilketara aplikatuta, otsailera arte hilabete bakoitzeko 1,5 kilotik gora jasotzen ziren; gaur egun, kopurua ia hirukoiztu egin da, 4,59 kiloraino iritsiz.

Era berean, gainerako hondakinen bilketa nabarmen murriztu da, eta horrek zabortegira eramaten den hondakin kopurua txikiagotu du. Txartel bidezko edukiontziak ezarri zirenetik, gainerako hondakinak 141.280 kilotik 88.580 kilora jaitsi dira urte bakarrean.

Horrek esan nahi du herritarrek hondakinak hobeto bereizten eta sailkatzen dituztela; beraz, zaborraren tratamendua eraginkorragoa da eta askoz gutxiago kutsatzen du. Labur esanda, hondakin mota bakoitza behar bezala kudeatzeko eta aprobetxatzeko gaitasun handiagoa dugu.

Zabor-poltsak kanpoan uztea, uste baino arazo txikiagoa

Mankomunitatean jakina da edukiontziak ixteak ondorio negatibo bat izan dezakeela: kanpoan uzten diren poltsen kopurua handitzea. Egia da itxiera ez dela arrazoi bakarra: poltseo deritzona askotariko jatorriak dituen arazo konplexua da, baina argi dago edukiontzien itxierak eragin zuzena duela.

Hala ere, Antsoainen edukiontziak itxita dituzten beste eremu batzuetan baino zabor-poltsa gutxiago uzten dira lurrean. Gainerako eremuekin alderatuta, Antsoainen pilatzen diren poltsen kopurua %50 txikiagoa da.

Zabor-poltsak lurrean uztearen aurkako plana

Datu horiek are gehiago murrizteko asmoz, Mankomunitateak “Talka Plan” bat jarri du abian, portaera hori kezkagarriagoa den guneetan esku hartzeko. Antsoainen, udalaren lankidetzari esker, honako neurriak hartuko dira:

• Aurrebilketako ibilbideak hobetzea.
• Eragin handieneko eremuetan komunikazio-ekintzak bultzatzea.
• Puntu kritikoetan kontrola areagotzea eta, beharrezkotzat jotzen denean, isunak ezartzea.