Bost ikasgelatan toldoen, lama orientagarrien eta haizagailuen eragina aztertzen ari dira, eraikinean etorkizunean egin beharreko jarduketak erabakitzeko.

Antsoaingo Udala maiatzaren amaieratik ikastetxe publikoan kontrol termikorako jarduketa pilotuen plana garatzen ari da, ikasgeletako erosotasuna hobetzeko zer neurri izan daitezkeen eraginkorrenak aztertzeko, neurri handiagoko esku-hartzeak egin aurretik.

Ikasgelak dauden eraikinaren orientazioa ekialdetik mendebaldera doa, eta horrek barruko tenperatura igotzea eragiten du udaberriaren amaieran eta uda hasieran. Egoera horrek bereziki eragiten die ekialdera begira dauden ikasgelei, eguzki-argi zuzena ordu gehiagotan jasotzen baitute.

Udalaren 2026ko aurrekontuetan partida bat dago eraikinean probak eta saiakerak egiteko. Helburua da etorkizuneko obren inguruko erabakiak hartu aurretik datu argiak izatea; esaterako, uda honetan sortuko den Ikasnova ikasgela esperimentalean.

Proba bigarren solairuko bost ikasgelatan egiten ari dira, eguzkiaren eragin handiena jasotzen duen eremuan. Horietako bat erreferentziazko ikasgela gisa erabiltzen da, neurri osagarririk gabe. Gainerakoetan, hainbat irtenbide jarri dituzte: toldo motordunak, lama bertikal orientagarriak, haizagailuak eta toldoen eta haizagailuen konbinazioa.

Ikasgela guztietan tenperatura neurtzen ari dira egunero hainbat astez. Era berean, galdetegi baten bidez, ikasleen eta irakasleen erosotasunaren pertzepzioa ere jasotzen ari dira.

Azterlanak erreferentziazko ikasgelan erregistratutako tenperatura eta gainerako espazioetako tenperaturak alderatzen ditu. Horrez gain, sistema bakoitzaren balorazioa ere aztertzen du, hainbat alderdi kontuan hartuta: eguzki-babesa, barruko argitasuna, kanporako ikusmira, erosotasuna, sentsazio termikoa, airearen abiadura edo zarata.

Proiektu pilotuaren kostua 12.037 eurokoa da, BEZa aparte. Jarduketa honen bidez, Udalak ikastetxearen inguruko hurrengo erabakiak datu kontrastatuetan eta eraikina egunero erabiltzen duten pertsonen benetako esperientzian oinarritzea du helburu. Behin betiko irtenbidea Nafarroako Gobernuko Hezkuntza Departamentuarekin batera landu beharko da, ikaskuntzaren kalitatean eta ikastetxeko langileen lan-baldintzetan eragina duelako.

Lehen ondorioak

Proiektu pilotuaren lehen ondorioek oso modu positiboan baloratzen dute haizagailuen instalazioa. Erosotasun-sentsazioa nabarmen hobetzen da, bereziki bero handiko egunetan, kanpoan haizerik ez dagoenean.

Hobetu beharreko alderdien artean, ikusi dute ikasleen pertzepzioa aldatu egiten dela ikasgelaren barruan duten kokapenaren arabera. Horregatik, ikasgela bakoitzean hiru edo lau haizagailu jartzeko aukera aztertzen ari dira, bai dagoeneko esku hartu den geletan, bai etorkizuneko jarduketetan.

Eguzki-babeserako sistemei dagokienez, balorazioa hobea da toldoen kasuan lama orientagarrien kasuan baino. Bi sistemek nabarmen hobetzen dute argiaren erosotasuna, baina toldoek erabilera errazagoa eskaintzen dute, inklinazio-aukera gehiago dituzte eta balorazio orokor hobea jasotzen dute.

Ondoriorik argiena da ikasgela berean toldoak eta haizagailuak batera erabiltzeak hobetu egiten dituela bai eguzki-babesa bai erosotasun termikoa.

Jarraipenak azpimarratzen du, halaber, eraikina bera erregulazio termikorako tresna gisa erabiltzen ikastearen garrantzia. Estrategiarik eraginkorrenak dira leihoak egunsentian irekitzea aireztapen gurutzatua errazteko, toldoak goiz-goizetik jaistea, eguzkia indartzen denean leihoak ixtea eta egunak aurrera egin ahala toldoak pixkanaka igotzea.

Kanpoko baldintzak eraikina freskatzeko baliatzeak ez du kosturik, eta toldoekin eta haizagailuekin batera erabilita, ikasgeletako erosotasuna nabarmen hobetu dezake.