433.542 euroko superabit doitua eta gastu orokorretarako 2 milioi eurotik gorako gerakinarekin, Udalaren egoera ekonomiko sendoak inbertsio berriak gauzatzea ahalbidetuko du. Besteak beste, Tokiko Inbertsioen Planean zehaztutako kaleen hobekuntza, eskoletako aterpea eta udalerriko beste hainbat esku-hartze.

Gaurko osoko bilkuran Antsoaingo Udalak 2025eko Kontu Orokorra onartu du. Hasiera batean, ekitaldiko aurrekontu orokor bateratua 11.928.299,24 eurotan onartu zen, eta urtean zehar egindako aldaketen ondoren, 13.676.153,52 eurotan itxi da.

Datu esanguratsuenetako bat aurrezki garbia da: 1.026.798,48 eurora iritsi da, aurreko ekitaldiko 697.410,07 euroen aldean. 2017tik izandako altuena da. Kontu-hartzailetzaren txostenaren arabera, adierazle horrek berresten du Udalak bere ohiko gastuei aurre egin ez ezik, baliabide ekonomiko berriak sortzeko gaitasuna duela.

Diruzaintzako gerakinak ere hobera egin du. Gerakin osoa (udal kutxa) 2.167.452,54 eurokoa da, eta gastu orokorretarako gerakina, benetako finantzaketa-ahalmena neurtzen duena, 2.010.452,54 eurora iristen da. Kopuru horrek igoera nabarmena dakar 2024ko 1.351.267,12 euroen aldean.

Egoera ekonomiko horri esker, udalerriarentzat garrantzitsuak diren hainbat inbertsiori ekin ahal izanen zaie, hala nola eskoletako aterpearen hobekuntza, jada martxan dagoena eta ikasturte hasierarako amaituko dena, edota Lapurbide kaleko oinezko konexioaren egokitzapena. Era berean, Arturo Campion, Nafarroa eta Harrobi kaleko eta zeharbideko obrei zorpetzera jo gabe ekiteko aukera baloratzen ari da.

Txostenak zehazten duenez, Udalak aurrekontu-egonkortasunaren araua betetzen du, 815.030,24 euroko finantzaketa-ahalmenarekin, baita gastu-araua ere, gastu konputagarria %1ean hazi baitzen, 2025erako ezarritako %3,2ko mugaren azpitik. Horrez gain, ekitaldia ixtean Udalak ez zuen finantza-pasiborik, eta biztanleko zorra zero eurokoa zen.

2025ean gauzatutako inbertsioak

2025ean zehar egindako inbertsioak 708.926,01 eurokoak izan ziren. Jarduera aipagarrienen artean honako hauek nabarmentzen dira:

• Azpiegitura Berdearen Planeko Jarduerak (284.959,02 euro)
• Sarbide eta birgaitze lanak (108.641,32 euro)
• Komun autogarbigarriaren instalazioa (71.443,28 euro)
• Kirol-eraikin eta -instalazioetako hobekuntzak (58.528,16 euro)
• Lorategietarako makineria (23.569,07 euro)
• Kultura arloko aurrekontu parte-hartzaileak (16.158,98 euro)
• Haur Eskolako berrikuntzak, ekipamendua eta altzariak (18.080,61 euro)
• Azpiegitura informatikoaren egokitzapena (14.673,26 euro)
• Hiri Mugikortasun Jasangarriko Planaren eguneraketa (11.999,99 euro)

Datu horien aurrean, Marta Díez Napal alkateak adierazi du “2025eko Kontu Orokorrak Udalaren egoera ekonomiko sendoa berresten duela. Milioi bat eurotik gorako aurrezki garbia eta gastu orokorretarako bi milioi eurotik gorako gerakina izateak aukera ematen du hurrengo hilabeteetan herriarentzako inbertsio garrantzitsuei aurre egiteko, zorpetzera jo beharrik gabe”.