“Antsoain gara – Somos Ansoáin” leloa aukeratu da udalerri honetako bizilagunak 2024/2030 Antsoaingo Plan Estrategikoa egiteko uda honetan hasitako prozesuanparte hartzera animatzeko. Plan hori 2030 Agendarekin eta Garapen Jasangarriko Helburuekin bat dator.

Plan horri esker, herritar, eragile eta talde politiko guztiek herriarentzako etorkizunerako ikuspegi bat zehaztu ahal izango dute, eta prozesuan zehaztutako helburuak lortzeko ekintza estrategikoak identifikatu ahal izango dira.

Gaur egin da lehen foro soziala, eta bertan izan dira herriko kolektibo eta elkarteetako ordezkariak, baita banakako herritarrak ere.

“Une erabakigarria da hau, herritar, eragile eta talde politiko guztiek partekatuko duten gure herriaren etorkizunerako ikuspegia eraikitzeko, eta herritarrak erdigunean jarriko dituen eta pertsonen zein planetaren zaintza-gizartea sustatzen lagunduko duen herriaren kontakizuna definitzeko. Antsoaingo komunitatearen etorkizuna definitzeko unea iritsi da, eta herritarren parte-hartzea funtsezkoa da plan honek sektore guztien beharrak eta nahiak isla ditzan”, nabarmendu du Marta Diez Napal alkateak aurkezpenean.

Plan Estrategikoa

Planak 2030erako helburua honako hau da: gizarte-kohesioa, ingurumen-jasangarritasuna, hiri-eraldaketa eta bizi-kalitatea hobetuko dituzten proiektu estrategikoak identifikatzea eta gauzatzea, bai eta adostasunak erraztea eta inbertsioak erakartzea ere.

Dokumentu hau egiteko prozesua gobernantza parte-hartzaileko ereduan oinarritzen da. Eredu horrek Talde Eragile bat zuzentzen du prozesu osoa gidatu eta koordinatzeko. Gainera, Talde Tekniko bat sortu da, Udaleko langileak partaide dituena, Talde Politiko bat, EH Bildu, PSN, Contigo Zurekin eta Geroa Baiko zinegotziekin, eta Foro Sozial bat, herritarren eta herriko elkarte eta kolektiboen parte-hartzeari irekia. Prozesuan zehar, foro horren bost bilera egingo dira guztira, eta nahi duten pertsonak eta kolektiboak joan daitezke bileretara. Azkenik, prozesuan sortzen diren gaien arabera, Gaikako Taldeak sortuko dira. Talde horietan herritarrek, gizarte-eragileek eta udaleko langileek hartuko dute parte, alderdi zehatzak jorratzeko.

Prozesuan zehar, Antsoaingo bizilagunek beren ikuspegia emateko beste modu batzuk ere badituzte, bai online galdetegien bidez, bai off-line herri-kontsulten bidez, jendea ibiltzen den lekuetan jarritako postontzien bidez eta beste jarduera batzuen bidez. Jaietan, informazio-standak jarri ziren hainbat gunetan, eta, guztira, 152 inprimaki jaso ziren, bizilagunen proposamenekin.

Aldez aurreko lan gisa, udan zehar, udalak kontratatutako lantalde teknikoak herriaren egungo egoeraren diagnostiko kualitatiboa eta kuantitatiboa egin du, dokumentazioa aztertuz eta udal-zerbitzuekin elkarrizketak eginez.

Oraingo fasean, misioa, ikuspegia eta balioak zehaztuko dira, ondoren helburuak eta horiek lortzeko gauzatu beharreko ekintzak zehazteko. Azkenik, finantzaketa-plan bat ezarriko da, ekintza bakoitzaren aurrekontua zenbatetsiz eta finantzaketa-iturriak mapeatuz. Azken dokumentua 2025eko ekainean entregatuko da.
Proiektuaren aurrekontua 50.000 eurokoa da. Parte-hartze prozesuaren berri emateko, kartelak eta liburuxkak argitaratu dira, eta bideo bat egin da, non udaleko teknikariek eta politikariek eta kolektibo eta elkarteetako ordezkariek parte hartzen duten.