Abenduak 11n, Antsoaingo udalak lan-bilera bat izan zuen udalerriko industrialdeko enpresekin, eremuaren egungo egoera elkarrekin aztertzeko eta azken urteetan antzemandako arazoak lehengoratzeko aukera emanen duen premiazko jarduera-plan batean aurrera egiteko. Topaketan 20 pertsona baino gehiagok parte hartu zuten, industrialdeko enpresetako ordezkariek, udal teknikariek, Udaltzaingoak eta Iruñerriko Mankomunitateko arduradunek, besteak beste.

Bileran jarduketa-eremu nagusiak aurkeztu ziren: garbiketa eta apaindura, isurketen kudeaketa, segurtasuna, mantentze-lanak, hirigintza-garapena eta espazio publikoaren hobekuntza. Udalak orain arte bultzatutako neurriak zehaztu zituen, hala nola 2023an onartutako garbiketa eta apainduraren gaineko ordenantzaren aplikazioa, gaur egun erabilerarik ez duten lursailen itxitura, edukiontzien zenbait punturen berrantolaketa, eta poligonoan egindako mantentze- eta seinaleztapen-jarduerak.

Iruñerriko Mankomunitateak hondakinen egoeraren diagnostikoa aurkeztu zuen, bai eta martxan dauden jarduketak eta epe labur zein ertainean aurreikusitakoak ere. Besteak beste, 2026ko udazkenetik aurrera industrialdean atez ateko bilketa ezartzea aurreikusten da. Bestalde, Udaltzaingoak segurtasuna indartzeko abian jarritako lan-ildoak azaldu zituen. Horien artean, poliziaren presentzia areagotzea, abandonatutako ibilgailuak kentzea eta kontrolik gabeko isurien aurrean disuasio-neurri posibleak aztertzea. 

Topaketak izaera parte-hartzailea izan zuen, bertaratu ziren enpresen eskariak entzuteko eta jasotzeko gune berezi batekin. Helburua ekarpen horiek aztertzea eta udaleko zein udalaz gaindiko jarduketak enpresa-sarearekin koordinatzea da, industrialdearen baldintzak pixkanaka hobetzeko eta epe labur eta ertainean hobetzeko ikuspegian kokatzeko.