2024-2030 Plan Estrategikoan jasotako ekimenaren helburua energia berriztagarria modu kolektiboan sortu, partekatu eta kudeatuko duen herri-erakunde bat eratzea da

Antsoaingo Udalak joan den urrian abiatutako prozesuarekin aurrera jarraitzen du, tokiko energia-komunitate bat sortzeko bidean. Ekimenari esker, interesa duten pertsonek prestakuntza jaso, aukera guztiak aztertu eta etorkizuneko erakundearen oinarriak elkarrekin zehaztu ahal izanen dituzte.

Proiektuaren aurkezpen publikoa abuztuaren 25ean izanen da, 20:00etan, Udaletxeko osoko bilkuren aretoan. Saioa herritar guztiei zuzenduta dago, eta proiektuaren nondik norakoak azaltzeko, zalantzak argitzeko eta komunitatea bultzatuko duen talde eragilea osatzen hasteko balio izanen du.

Energia-komunitatearen sorrera Antsoaingo 2024-2030 Plan Estrategikoan jasotako ekintzetako bat da, parte-hartze prozesu baten ondoren onartutakoa. Proiektuari lehentasuna eman zitzaion udalerri jasangarriago bat eraikitzeko eta energia-eredu lokalago eta kolektiboago baterantz aurrera egiteko duen ahalmenagatik.

Herritarrek kudeatutako erakundea

Energia-komunitatea hainbat pertsona, erakunde eta administrazioren arteko lankidetzan oinarritzen den antolaketa modu bat da, energiarekin lotutako proiektuak garatzeko. Horri esker, besteak beste, udalerrian bertan energia berriztagarria ekoitzi, autokontsumo kolektiboko sistemen bidez partekatu eta energia-eraginkortasuna edo mugikortasun jasangarria sustatzeko ekimenak garatu daitezke.

Antsoainen sortu nahi den energia-komunitatea herritarrek gidatutako erakunde bat izanen da, etorkizuneko energia-proiektuak modu kolektiboan kudeatzeko. Hala ere, oraindik ez da erabaki zein forma juridiko hartuko duen, nola antolatuko den edo zein proiektu zehatz garatuko dituen. Gai horiek prozesuan zehar eginen diren saioetan aztertuko dira. Helburua ez da aurrez diseinatutako eredu bat ezartzea, baizik eta parte-hartzaileek aukera guztiak ezagutu eta informazio tekniko nahikoa izanda erabakiak hartu ahal izatea.

Talde eragilearen sorrera

Prozesua Antsoaingo bizilagunek osatutako talde eragile baten bidez egituratuko da. Talde horrek izaera egonkorra izanen du eta etorkizuneko komunitate energetikoa martxan jartzeko beharrezkoak diren lanak bideratzeaz arduratuko da.

Parte-hartzen duten pertsonek laguntza eta prestakuntza jasoko dute hiru arlo nagusitan: energia berriztagarriak eta sektore energetikoaren funtzionamendua; araudia eta egitura juridikoa; parte-hartzea, antolaketa eta talde-kudeaketa.

Prestakuntza horri esker, modu kolektiboan erabaki ahal izanen dira erakundearen forma juridikoa, printzipio eta balioak, gobernantza-sistema, barne-antolaketa eta udalerrian garatu daitezkeen energia-proiektuak.

Bost saio iraila eta urria bitartean

Aurkezpen publikoaren ondoren, talde eragileak aurrez aurreko bost saiotan parte hartuko du: irailaren 1ean, 8an, 15ean, 22an eta 29an.

Lanak jarraikortasuna izanen du, eta saio bakoitza aurrekoan adostutako ondorioetatik abiatuko da.

Horrez gain, etorkizuneko komunitatearen kudeaketa, administrazioa eta komunikazioa lantzeko ibilbideak eta lan-batzordeak zehaztuko dira. Urriaren 6an komunikazioari buruzko laguntza-saio berezi bat eginen da, eta urriaren 13an prozesuaren emaitzen aurkezpen publikoa. Ondoren, hala badagokio, erakundea juridikoki eratzeko izapideak hasiko dira.