Antsoaingo Udalak aurrekontu aldaketa garrantzitsuak onartu ditu gaur ospatutako azken osoko bilkuran. Aldaketa horien helburua herri zaharrera doan bidean obrak finantzatzea, Nafarroako Aurrekontuaren zuzenketa izendunetatik datozen inbertsioak integratzea eta tokiko kirol entitateekin sinatutako hitzarmenak indartzea da. Erabaki horiek komunitatearen lehentasunezko premiei erantzuten diete, baita udalerriko azpiegiturak eta kirol zerbitzuak sendotzeko konpromisoari ere.

Maiatzaren erdialdean, Antsoainek herri zaharrerako bidean obrak hasiko ditu, udalbatzak 56.206,94€-ko aurrekontu-zuzkidura aho batez onartu ondoren, nahiz eta obren azken kostua txikiagoa izatea espero den.

Aipatzekoa da esleipen hori azkenean udaleko diru-kutxetatik datorrela, eta ez 2023ko Nafarroako Aurrekontuaren zuzenketa izendunetatik, joan den urtean diru horren erabilera blokeatu zuen aurrekontu-sailaren nomenklatura arazo batengatik, lan administratibo guztia amaituta izan arren. Marta Díez Napalalkateak nabarmendu duenez, “ezin genuen obra egin gabe utzi, udalari emandako lurzoruaren jabeek egindako ahalegina eta gero, gauzatutako esfortzu teknikoa eta herri zaharrean bizi diren pertsonekin dugun konpromisoa kontuan izanik. Hala adierazi genuen apirilaren 9an alde zaharreko bizilagunekin izandako bileran, eta erabaki horrekin gure konpromisoa bete genuen”.

Gainera, ekitaldi honetako Nafarroako aurrekontuan herrira bideratutako partida izendunak diru-sarreren kapituluan sartzea onartu da. Diru hori hurrengo gastuak ordaintzeko erabiliko da: Azpiegitura Berdearen Planean zehaztutako funtsezko proiektuak aurrera eramateko, kirol-instalazioen gizarte-arloa hobetzeko, adinekoentzako eta/edo mendekotasuna duten pertsonentzako jantoki kolektiboa finantzatzeko, eta bizikletak konpondu eta garbitzeko puntu bat, Agility zirkuitu bat eta bakarrik garbitzen den bainugela publiko bat instalatzeko. Inbertsio horiek, guztira 295.000 euroko gastu bat suposatzen dutenak, datozen hilabeteetan egingo dira.

Era berean, udalaren eta tokiko kirol-kluben artean sinatutako hitzarmen bakoitzerako berariazko aurrekontu-sailak esleitu dira, Kontuen Ganberaren aurtengo txostenak zehaztutako gomendioa betez. Horrek laguntza egituratu eta iraunkorra bermatzen die halterofilia, eskalada, triatloia, gimnasia erritmikoa, xakea, herri kirolak, judoa, futbola eta saskibaloia bezalako diziplinei.

Osoko bilkura berean, eta Kontuen Ganberaren gomendioei jarraituz, Udalaren 2024. urteko kontratazio-plana onartu da.

Azkenik, Udalak Nasuvinsarekin duen hitzarmena aurrera eramateko epea luzatu egin da. Elena-Primavera izeneko proiektuaren helburua eraikitako inguruneen birsorkuntza energetikoa bermatzea da.