Ekimenaren aurkezpena Idakin egin zen, Homofobiaren, Transfobiaren eta Bifobiaren Aurkako Nazioarteko Egunaren harira antolatutako ekitaldien barruan

Antsoaingo Udalak joan den ostiralean, maiatzaren 15ean, formatu handiko lona bat inauguratu zuen Idaki kiroldegian, kirol eremuetan gertatzen diren indarkeria eta diskriminazio egoeren aurka. Lona instalazioaren fatxadan jarri da, eta maiatzaren 17aren, Homofobiaren, Transfobiaren eta Bifobiaren Aurkako Nazioarteko Egunaren, harira Udalak antolatutako ekimenen parte da.

Ekitaldian Marta Díez Napal Antsoaingo alkateak hartu zuen hitza, eta hitz batzuk egin zituen indarkeriarik gabeko kirol eremu baten inaugurazio sinbolikoa egin aurretik. Ekintza honen bidez, Udalak mezu argia helarazi nahi izan zuen: kirolean ez dute tokirik inolako indarkeria-, diskriminazio- edo bazterkeria-motek. “Kirolak pertsona guztientzako espazio segurua izan behar du. Edozein pertsonak, bere sexu-orientazioa, genero-identitatea edo genero-adierazpena edozein direla ere, parte hartu, elkarrekin bizi eta baldintza berdinetan senti ahal izateko tokia. Lona hau sinbolo hutsa ez ezik, mezu argia ere izatea nahi dugu: Antsoainen ez dute lekurik LGTBI+fobiak, diskriminazioak eta inolako indarkeria motek”, nabarmendu du alkateak.

Ekimenaren jatorria Makusi prozesuan dago. Prozesu hori Antsoainen garatu zen 2026-2030 aldirako udaleko I. LGTBI+ Plana prestatzeko diagnostikoa egin eta ondorengo diseinu-lana garatzeko. Lanketa horretan identifikatu zen kirol eremuetan ere esku hartzeko beharra zegoela; izan ere, komunitatearen funtsezko espazioak dira, eta oraindik ere sexu- eta genero-aniztasunarekin lotutako diskriminazio-, bazterkeria- edo indarkeria-egoerak gerta daitezke bertan.

Diagnostiko horretatik abiatuta, I. LGTBI+ Planak hainbat ekintza jaso zituen udaleko esparru eta arlo desberdinetan banatuta. Kasu honetan, lona jartzea Kirolaren arloan aurreikusitako neurrien parte da, eta Planaren egungo ezarpen fasearen barruan kokatzen da.

Maiatzaren 17arekin, Homofobiaren, Transfobiaren eta Bifobiaren Aurkako Nazioarteko Egunarekin, bat eginez, Udalak kirol eremuan edozein diskriminazio edo indarkeria motaren aurkako mezua indartu nahi izan du.

3,2 x 3 metroko neurria duen eta izaera iraunkorra izanen duen lonaren bidez, prebentzio-mezuak eta seinaleztapen inklusiboa txertatu nahi dira kirol instalazioetan. Lan-ildo horrek LGTBI+fobia egoeren aurrean jarduteko orientabideak eta etorkizunean kirol eremuari lotuta garatuko diren sentsibilizazio- eta prestakuntza-ekintzak ere jasotzen ditu.

Jarduketa honen helburua da Udalak sexu- eta genero-aniztasunarekin eta berdintasunarekin duen konpromisoa ikusaraztea, herritarrak sentsibilizatzea eta kirol instalazioak pertsona guztientzako espazio seguru, berdinzale eta errespetuzkoak izan daitezen laguntzea.

Gainera, lona hau Antsoaingo Udalak 2026-2030 aldirako I. LGTBI+ Planaren bidez udalaren esparru desberdinetan pixkanaka garatuko duen lanaren lehen adierazpen publikoetako bat da.